Tesla şirkəti premium elektromobil modellərinin istehsalat həcmini lazımi səviyyəyə çatdırmayana kimi ucuz qiymətə satılan Model 3-ü yüksək istehsalat səviyyəsinə çatdıra bilməz. Əgər Tesla indiki zamanda qiyməti 35.000$ olan Model 3-ü kütləvi istehsalata buraxsa, şirkət məhv ola bilər. Bu barədə Elon Musk öz Twitter hesabında bildirib. Musk-ın sözlərinə əsasən şirkət həftədə 5000 ədəd avtomobil istehsalat etməlidir ki, Model 3 şirkəti iflasa uğratmasın.

“İlk öncə lazımi istehsalat tempinə çatmaq daha sonra onu optimallaşdırmaq lazımdır ki, yekun dəyərə çıxa bilək. Ən ucuz Model 3-ün hal-hazırda kütləvi istehsal edilməsi şirkətin yüksək miqdarda pul itkisinə səbəb ola bilər və şirkəti məhv edə bilər. Biz yaxın 3-6 ay ərzində həftədə 5000 ədəd elektromobil istehsal etməliyik ki, Model 3-ün istehsalatı zamanı şirkət iflasa uğramasın” – deyə Elon Musk bildirib.

Qeyd etmək lazımdır ki, Tesla Model 3 iki versiyada istehsal olunur. 35.000$ qiymətə sahib versiya saatda 210 km sürət yığır və bir dəfə şarj olunandan sonra 350 km yol qətt edə bilir. 44.000$ qiymətə sahib versiya isə saatda 225 km sürət yığır və 500 km yol qətt edə bilir. Qeyd edək ki, dünən verdiyimiz xəbərdə qeyd etmişdik ki, Tesla şirkəti 2 batareyalı Model 3-ün istehsalatını planlaşdırır.